Avokati i Qytetit.

Në mbështetje, plotësim apo transparencë më të plotë të aktivitetit të  Institucionit tonë ndaj komunitetit, me iniciativën e propozimin e drejtë-përdrejtë të Kryetarit të Bashkisë Z.Qazim Sejdini, Këshilli Bashkiak në        organostrukturën e Bashkisë për vitin 2008 ka miratuar dhe përfshirë në strukturë funksionin e Avokatit të Qytetit. Në thelb, për një qeverisje lokale transparente, besimi i plotë reciprok i komunitetit me Institucionin e Bashkisë, bën përfshirjen e gjerë të qytetarëve në proçeset vendim-marrëse të Bashkisë. . Për vitin 2008 Avokati i Qytetit ka dhënë një kontibut të rëndësishëm në zgjidhjen e Kërkesave apo Ankesave të veçanta  ( pasi janë trajtuar nga Drejtoria e Marëdhënieve me Publikun dhe strukturat me të cilat kanë të bëjnë ato) të cilat janë adresuar nga udhëheqja e Bashkisë për shqyrtim. Megjithëse një institucion i ri në përbërje të administratës së Bashkisë, impakti i krijimit të tij ka qenë i konsiderueshëm, si në reflektimin në aktet apo proçedimet e Administratës së Bashkisë, të zbatimit rigoroz të proçedurave në marëdhënie me qytetarët, ashtu edhe në drejtim të vetë qytetarëve duke reduktuar nëpërmjet konsulencave të dhëna, burokracitë e trajtimit të kërkesave të tyre. Në kuadër të zbatimit të detyrave, një kujdes i veçantë në këtë sektor i është kushtuar punës  për respektimin e afateve ligjore të trajtimit të kërkesave  apo ankesave të qytetarëve si dhe respektimit të të drejtave ligjore të tyre për të marë pjesë aktive në proçedimet administrative e për të paraqitur  në to  pretendimet apo kundërshtitë e tyre. Gjithashtu, përveç anës proçeduriale, në mjaft raste ka patur nevojë  edhe për ndërhyrje në trajtimin e çështjeve në thelbin e tyre, në mënyrën e drejtë të zgjidhjes apo reflektimit të problemit
Kështu nga avokati i qytetit janë trajtuar edhe mjaft kërkesa e ankesa të qytetarëve, që megjithëse nuk kanë patur si objekt të tyre aktivitetin e administratës Bashkiake, janë konsultuar  dhe orientuar proçedurat ligjore me institucionet apo subjektet që duhen të adresohen. Përveç kësaj, në këto raste, me autoritetin e Kryetarit të Bashkisë, i është kërkuar edhe institucioneve të tjera  jashtë juridiksionit të Bashkisë, informacioni i nevojshëm duke kërkuar njëkohësisht prej tyre respektimin e të drejtave proçeduriale të qytetarëve, bazuar në Kodin e Proçedurave Administrative. Së fundi avokati i qytetit ka mbajtur lidhje të vazhdueshme me avokatin e popullit, duke organizuar edhe pritje të përbashkëta me këtë të fundit në qytetin e Elbasanit, gjatë vitit 2008, ç’ka ka kontribuar në përmirësimin dinamik të punës në këtë sektor.