Bashkia Elbasan vë në dispozicion për vitin 2008 një fond prej 1.500.000 lekësh nga të ardhurat e veta për familjet në nevojë

Elbasani është një qytet me një popullsi relativisht të madhe por  dhe me papunësi dhe probleme sociale të shumta të cilat janë të trashëguara prej kohësh. Numri i qytetarëve që paraqiten tek administratorët e ndihmës ekonomike nëpër njësitë administrative por edhe pranë Drejtorisë së Kujdesit Social, Kryetarit të Bashkisë apo dhe Këshillit Bashkiak është i konsiderueshëm. Një pjesë e tyre janë familje me të  vërtetë të varfëra dhe me probleme sociale nga më të ndryshmet, një pjesë e të cilave janë trajtuar me ndihmë ekonomike në përputhje me ligjin Nr.9355 datë 10.03.2005 “Për ndihmën dhe shërbimet shoqërore’ dhe  VKM Nr.787 datë 14.12.2005 “Për  kriteret, procedurat dhe masën e ndihmës ekonomike”.
Por nga studimi i kryer dhe ballafaqimi i rasteve të paraqitura ngelet pa u trajtuar edhe një kategori që del jashtë kritereve të akteve të mësipërme ligjore dhe nënligjore por që në të vërtetë janë në gjëndje të rëndë ekonomike dhe sociale. Pikërisht për t’ju ardhur në ndihmë kësaj kategorie familjesh mbështetur në ligjin Nr.9355 datë 10.03.2005 Bashkia Elbasan ka vënë në dispozicion për vitin 2008 një fond prej 1.500.000 lekë nga të ardhurat e veta. Ndonëse kjo shumë e akorduar për ti ardhur në ndihmë familjeve të cilat janë me të ardhura të pakta ekonomike nuk mund të zgjidhë tërë problemin por gjithsesi i vjen në ndihmë një pjesë të komunitetit.
Po  kështu  me vendim Nr.19 datë 27.02.2008  Këshilli Bashkiak ka përcaktuar edhe kriteret specifike për familjet që do të trajtohen me këto fonde.
Do të përfitojnë ndihmë me këto fonde:
1. Familje shumë të varfëra të cilat janë regjistruar në zyrat e gjëndjes civile në qytet pas datës 01.08.1991 deri në 31.12.2005 dhe nuk përfitojnë nga  VKM  Nr.787 datë 14.12.2005.
2. Vajza me moshë të madhe ( mbi 40 vjeç) të cilat janë ndarë nga trungu familjar pas datës 1.07.1993 deri në 31.12.2000 (pika 10/e e VKM Nr.787 datë 14.12.2005)
3. Familje me kryefamiljarë në burg apo me probleme të tjera sociale.
4. Femijët jetimë deri në moshën 18 vjeç që nuk janë të vendosur në institucione rezidenciale të shërbimeve dhe nuk përfitojnë pagesa të tjera.
Dokumentacioni për përfitimin e kësaj ndihme do të jetë i njëjtë me atë të ndihmës së zakoneshme. Koha e aplikimit për çdo të interesuar është nga data 1 deri në 15 të çdo muaji. Të gjithë kërkuesit e kësaj ndihme do t’i nënshtrohen proçesit të verifikimit të gjëndjes ekonomiko-sociale dhe vendimarrjes në Këshillin Bashkiak