"5 Maj" Dita e Deshmoreve

Në ditën e “5 Maj”it ditën e dëshmorëve personalite vendorë, familjarë të dëshmorëve, veteranë dhe qytetarë të thjeshtë morën pjesë në homazhet që u bënë tek varrezat e dëshmorëve të qytetit në respekt të të rënëve gjatë luftës Antifashiste Nacional Çlirimtare.

Në këtë ceremoni vendosën kurora Kryetari i Bashkisë,   Prefekti, Deputetë, përfaqësues të partive të ndryshme, përfaqësues të shoqatave etj. Pas ekzekutimit te Himnit Kombëtar fjalën e mori Kryetari i Bashkisë i cili u shpreh se ; Dita e Dëshmorëve është dita kur përkujtojmë me krenari jetën e atyre që u flijuan për Shqipërinë përgjatë udhëtimit të tyre të shenjtë për liri. Në këtë udhëtim të gjatë populli ynë patriot dhe liridashës angazhoi bijtë dhe bijat e tij duke marrë parasysh rrezikun ndaj pushtuesve, si dhe kontributin e tyre të pashtershëm duke dhënë jetën në vitet më të bukura të rinisë vetëm për një qëllim, çlirimin e atdheut.

Dëshmorët tanë janë të shumtë, emrat e tyre janë tani në librat, në shkollat, në rrugët dhe në sheshet e Shqipërisë, anembanë vendit tonë, por mbi të gjitha janë në kujtesën tonë, në kujtesën e kombit. Dëshmorët meritojnë nderim e respekt të thellë nga i tërë populli jo vetëm sot ne ditën e “5 Maj”´it, por gjithmonë dhe kjo të jetë një motiv për ne,  për të rinjtë e vendit tonë që të tërë sëbashku të vëmë në shërbim të vëndit dijen, punën e guximin për ta çuar në vënd amanetin e dëshmorëve.
Lavdi Dëshmorëve të Shqipërisë!
Më pas familjarët kryen homazhe pranë varreve e të të afërmëve të tyre, në përfundim Kreu i Bashkisë kreu vizita në disa nga familjet e dëshmorëve të qytetit.