Plani Social i Zonës.

Në Sektorin e Shërbimeve Sociale,  përmirësimi i cilësisë së shërbimeve kryhet përmes Zyrës të Planit Social të Zonës, ngritja e së cilës përbën kushtin bazë për zbatimin e Planit Social të Zonës. Ky i fundit, një bashkëpunim midis Bashkisë Elbasan dhe Shoqatës Italiane CEFA, është pjesë përbërëse e një projekti më të madh të titulluar “Zhvillimi vendor në Elbasan: në mbështetje të shërbimeve sociale për integrimin e grave dhe të rinjve në vështirësi, në jetën sociale dhe në tregun e punës”, financuar nga Komisioni Europian me një shtrirje kohore 3 vjecare. Projekti, i cili ka nisur që në Dhjetor të 2006, zbatohet nga shoqatat italiane CIES dhe CEFA në bashkëpunim me aktorët vendore, shoqata Tjetër Vizion dhe Bashkia Elbasan. Ky projekt krijon mundësinë e ngritjes së një rrjeti pune për shërbimet sociale që do t’i japë zgjidhje dhe rezultate konkrete  nevojave të përfituesve të grupeve vulnerabël.

Qëllimet e projektit janë:
1-Të përmirësojmë kushtet e jetesës për të rinjtë dhe gratë në vështirësi, duke mbështetur  integrimin e tyre në tregun e punës dhe në jetën shoqërore si pjesë e një qytetarie  aktive.
2- Të rrisim forcën dhe rrjetin mes institucioneve vendore, shoqërisë civile dhe  ndërmarrjeve  private sipas perspektivës së welfare-mix
3- Promovimi i përfshirjes sociale dhe punësimit të grave dhe të rinjve të Elbasanit, përmes kualifikimit profesional, kualifikimit në punë dhe aktiviteteve që prodhojnë të ardhura, duke mbështetur një proçes fuqizues të përgjithshëm dhe duke promovuar një lidhje sistematike mes institucioneve publike, ndërmarrjeve dhe ofruesve të shërbimit privat, duke forcuar koordinimin e tyre dhe kapacitetet e planifikimit sipas perspektivës së welfare-mix.

Ndërsa pjesa përbërëse e këtij projekti, pra Plani Social i Zonës, kërkon të favorizojë planifikimin e rrjetit të shërbimeve sociale, lejon përmirësimin e burimeve  njerëzore dhe financiare që janë në dispozicion duke zhvilluar format e ndryshme për bashkëpunimin midis publikut dhe privatit për krijimin dhe organizimin e shërbimeve sociale, ku operatorët kryesorë aktivë janë OJF-të.

Për arritjen e këtyre qëllimeve është ngritur një Zyrë, në brëndësi të strukturave të Bashkisë Elbasan, e cila do të shërbejë për zhvillimin e aktiviteteve të parashikuara në projekt për zbatimin e Planit Social te Zonës.
Ndërkohë, Nëngrupet Tematike janë krijuar sipas veçantive të ndryshme të përfituesve socialë në Elbasan, në menyrë që të garantojnë një nëndarje korrekte të punës mbi mbledhjen e informacionit madje edhe plotësimit të tij. Kjo ndarje e nëngrupeve tematike, e rimarrë nga zbatimi i të njëjtit projekt në vitin 2005-2006, nuk ka si qëllim  ndarjen e punës, përkundrazi, është menduar si një moment parësor ku kompetencat teknike dhe eksperiencat e realizuara të ballafaqohen së bashku.

Janë aktivizuar grupet e punës ndarë sipas grupeve vulnerabël:
- Fëmijë, Të rinj;
- Gra;
- Persona me aftësi të kufizuar;
- Mosha e tretë;
- Minoritete (romë, egjyptiane).

Janë organizuar disa tavolina pune kryesisht sipas grupeve të mësipërme dhe po punohet për paraqitjen e një portofoli projektesh tek donatorë që kanë shprehur interes, kryesisht rajoni Emilia- Romagna Itali.

Ne kuader te projektit Plani Social i Zones janë zhvilluar disa trajnime, ku kanë marrë pjesë OJF-te, stafi i Drejtorisë së Shërbimit Social, Administratorët e Ndihmës Ekonomike të Rajoneve etj, në fokus të të cilëve kanë qenë tematikat e grupeve vulnerabël.